رادھا

part 2

’’یا خدا ! یہ بلی ہے یا کوئی جن بھوت، بند گاڑی میں گھس آتی ہے ، سادھو اس سے باتیں کرتا ہے کھڑکی کا مضبوط شیشہ اس سے ٹکرا کر ٹوٹ جاتا ہے‘‘ یہ سب کیا ہے؟ ‘‘

میں نے سر کو دونوں ہاتھوں سے تھام لیا۔ اچانک مجھے کسی گاری کا ہارن سنائی دیا۔ میری گاڑی سڑک کے درمیان میں رکی ہوئی تھی اس لئے پیچھے سے آنے والی گاری کا ڈرائیور ہارن دے رہا تھا۔میں نے جلدی سے گاڑی کو آگے بڑھایا اور چل پڑا۔ بچوں کو سکول سے گھر چھوڑا اور دوپہر کاکہنا کھا کر میں دوبارہ بینک چلا گیا۔ دن گزرتے رہے اس کے بعد نہ تو مجھے سادھو ملا نہ ملنگ بابا نہ ہی کوئی عجیب و غریب واقعہ ہوا جس کی وجہ سے آہستہ آہستہ میں پچھلی باتیں بھول گیا۔ ہاں اکثر و بیشتر میرے ارد گرد کسی کی موجودگی کا احساس اور گلاب کی خوشبو ضرور محسوس ہوا کرتی۔

یک دن میں حسب معمول بینک جا رہا تھا۔ سڑک کے عین درمیان ایک برقع پوش لڑکی بوڑھی عورت کا ہاتھ پکڑ کر اٹھا رہی تھی۔ وہ شاید سڑک پار کرتے ہوئے گر گئی تھی۔ گاڑی کو آتے دیکھ کر لڑکی گھبرا گئی اس نے جلدی سے بوڑھی عورت کو بغلوں میں ہاتھ دے کر اٹھانے کی کوشش شروع کر دی۔ میں نے بریک لگائی اور گاڑی روک نیچے اتر آیا۔ لڑکی اب میری طرف دیکھ رہی تھی۔

’’کیا میں آپ کی کوئی مدد کر سکتا ہوں ، کیا ہوا اماں جی کو؟‘‘ میں نے قریب جا کر پوچھا۔ جھیل سی گہری آنکھیں آنسوؤں سے لبریز تھیں۔

’’اماں کو نہ جانے کیا ہو گیا ہے چکراکر گر پڑی ہیں‘‘ حسین آنکھیں آنسوؤں سے بھر گئیں۔ میں نے نیچے جھک کر دیکھا بوڑھی عورت کی آنکھیں بند تھیں اور سانس رک رک کر آرہا تھا شاید اسے کسی قسم کا دورہ پڑا تھا۔

’’اگر آپ کہیں تو میں ان کو ہسپتال پہنچا دوں؟‘‘ اس نے تشکر بھری نظروں سے میری طرف دیکھا۔

’’آپ ہمیں گھر تک پہنچا دیں تو آپ کی بڑی مہربانی ہوگی ان کی دوائی گھر میں پڑی ہے وہ کھائیں گی تو ٹھیک ہو جائیں گی دراصل ان کو مرگی کا مرض لاحق ہے کسی وقت بھی دورہ پڑ جاتا ہے۔ دوائی کھا لیں تو تھوڑی دیر میں ٹھیک ہو جاتی ہیں۔‘‘

’’آپ کا گھر کہاں ہے؟‘‘ میں نے گھڑی دیکھی ساڑھے آٹھ بج رہے تھے۔

’’ستائیس چک میں‘‘ وہ بھی کھڑی ہوگئی خاصی دراز قد تھی۔

’’دیکھئے خاتون! میں حال ہی میں اس شہر میں آیا ہوں ابھی تک یہاں کے علاقوں سے واقف نہیں ہوں۔ براہ کرم آپ بتائیں کہ آپ کا گھر یہاں سے کتنی دور ہے۔

زیادہ دور نہیں کوئی دو تین میل کے فاصلے پر ہے ہمارا گھر‘‘ ھے بتایا کہ کہیں میں انکار نہ کر دوں۔ میں آگے بڑھ کر بوڑھی عورت کو اٹھانے لگا وہ بھی میری مدد کر رہی تھی۔ اچانک اس کا نقاب سرک گیا۔ میری نظر اس کے چہرے پر پڑی تو میں دنگ رہ گیا۔ وہ قدرت کی صنائی کا ایک بہترین شاہکارتھی۔ بڑی بڑی سیاہ آنکھیں، گلابی دمکتا ہوا رنگ جیسے میدے میں گلاب گھول دیئے گئے ہوں۔ میں نے اتنا مکمل حسن آج تک نہ دیکھا تھا۔ چمپا بھی کچھ کم حسین نہ تھی۔ اور یہ تو میں آپ کو بتا ہی چکا ہوں کہ میری بیوی صائمہ خود بھی لاکھوں میں ایک ہے لیکن اس لڑکی کے حسن کا تو کچھ حساب ہی نہ تھا۔ میں نے بمشکل نظروں کو اس کے چہرے سے ہٹایا اور بوڑھی عورت کو اسکی مدد سے گاڑی کی پچھلی سیٹ پر لٹا دیا۔

اس نے دوبارہ نقاب چہرے پر نہ لگایا تھا گلاب کی ادھ کھلی کلی جیسے ہونٹ عمر اسکی بمشکل سترہ اٹھارہ سال ہوگی۔

’’راستہ بتاتی جائیے گا۔ یہاں کے راستے میرے لئے اجنبی ہیں‘‘ میں نے بمشکل اس کے چہرے سے نظر ہٹائی۔

’’راستے اجنبی ہو سکتے ہیں لوگ نہیں‘‘ وہ براہ راست میری آنکھوں میں دیکھتے ہوئے بولی۔ میں نے چونک کر اسکی طرف دیکھا۔ نظریں ملیں، افسوں خیز آنکھوں نے مجھے جکڑ لیا۔

’’گاڑی دائیں طرف موڑ لیجئے‘‘ میری محویت پر بڑی ہی دل آویز مسکراہٹ اس کے گلابی ہونٹوں پر مچل گئی۔

’’آں۔۔۔‘‘ جیسے میں نیند سے جاگ گیا۔ ’’آپ نے مجھ سے کچھ کہا؟‘‘

’’آپ کے علاوہ اورکون ہے میرا ۔۔۔میرا مطلب ہے یہاں ‘‘ حسین آنکھو میں شرارت تھی۔حسن نے مجھے ہر بات سے بے پرواہ کردیا تھا۔ اس کے بتائے ہوئے راستے پر گاڑی چلاتا رہا۔ کوئی آدھ گھنٹے کی ڈرائیو کے بعد ہم ایک گاؤں میں داخل ہوگئے۔ عام روایتی قسم کا گاؤں تھا۔ کچے مکانات، مٹی سے بھری گلیاں ، کھیت، لیکن عجیب بات یہ تھی دن کا وقت ہونے کے باوجودمجھے گاؤں میں ایک بھی متنفس دکھائی نہ دیا۔ انسان تو کجا جانور بھی نہیں۔ ہر طرف سنسانی کا راج تھا۔

’’بس گاڑی روک دیجئے وہ رہا میرا غریب خانہ‘‘ وہ بڑی شستہ اردو میں بات کر رہی تھی۔ میں نے دیکھا وہ ایک جھونپڑا نما مکان تھا۔‘‘ سچ کہتے ہیں حسن کسی کی میراث نہیں ہوتا‘‘ کون کہہ سکتا تھا کہ اس جھونپڑی میں اتنی حسین لڑکی رہتی ہوگی۔ میں گاڑی روک کر نیچے اترا تاکہ اس بوڑھی عورت کو اتارنے میں اسکی مدد کر سکوں۔ وہ بے ہوش تھی یا گہری نیند میں یہ اندازہ میں نہ کر سکا۔ پچھلا دروازہ کھولا تو وہ لڑکی بھی جلدی سے آگئی۔ ہم دونوں نے مل کر بڑی مشکل سے اسے گاڑی سے نکالا۔ اس دوران وہ بار بار اپنا گداز بدن میرے جسم کے ساتھ لگاتی رہی۔ میرے بدن میں جیسے بجلیاں سی دوڑ رہی تھیں۔ اس کے وجود کی مدھر مہک میری مشام جاں کو معطر کیے دے رہی تھی۔ بوڑھی عورت کافی بھاری جسم کی مالک تھی ۔تھوڑی سی مشقت نے لڑکی کے گلابی چہرے کو لال سرخ کر دیاتھا۔ قندہاری انار جیسے گال دہک اٹھے۔ ہم دونوں نے کسی نہ کسی طرح عورت کو اندر پہنچایا۔ دیہاتی طرزپرکچی مٹی سے بنا ہوا گھر تھا۔ کھلا سا صحن، کچے کمرے۔۔۔ایک طرف لکڑی کے بنے سٹینڈ پر گھڑے پڑے تھے۔ میری مدد سے اماں کو کمرے میں بستر پر لٹاکر وہ جلدی سے باہر نکل گئی۔ تھوڑی دیر بعد پانی سے بھرا کٹورہ لیے اندر آئی۔ اس نے برقعہ اتار دیا تھا جسم کے نیشب و فراز ایسے تھے کہ نظر پڑکر پلٹنا بھول جائے۔ جوانی جیسے اس پر ٹوٹ کر برسی تھی۔ میری نظروں کی تپش نے اس کا چہرہ گلنار کر دیا۔

’’ارے۔۔۔آپ تو ابھی تک کھڑے ہیں شاید ہمارا گھر اس قابل نہیں کہ آپ جیسا بڑا آدمی بیٹھ سکے۔‘‘ اس نے پانی کا کٹورہ مجھے پکڑایا اورایک بار پھر باہر چلی گئی۔ میں کمرے کا جائزلینے کے بعد بوڑھی عورت کی طرف متوجہ ہوا۔ وہ ابھی تک اسی حالت میں تھی۔ اس لڑکی نے کہاتھا کہ گھرجاکر اسے دوا دے لیکن یہاں پہنچ کر جیسے وہ اسے بھول ہی گئی تھی’’شاید دوالینے گئی ہو‘‘ میرے دل میں خیال آیا۔ میں ابھی اٹھنے کا ارادہ کرہی رہا تھاکہ وہ بادصبا کی جھونکے کی طرح کمرے میں داخل ہوئی

اسکے آنے سے جیسے نیم تاریک کمرہ روشن ہوگیا اس کے ہاتھ میں شیشے کا ایک گلاس تھا جس میں سرخ رنگ کی کوئی سیال شے بھری ہوئی تھی۔

’’یہ لیجئے جناب مجھے یقین ہے اس سے زیادہ لذیذ شربت آپ نے ساری زندگی نہ پیا‘‘ ہوگا اس نے بڑی اپنایت کے گلاس میری طرف بڑھایا۔

’’آپ تو زہر بھی پلائیں تو وہ بھی لذیذ ہی لگے گا‘‘ پہلا گھونٹ لیتے ہوئے نہ جانے کیسے یہ الفاظ میرے منہ سے نکل گئے۔

’’ہارے رام۔۔۔!آپ بڑے وہ ہیں‘‘ بے ساختہ اس کے منہ سے نکلا۔

’’آچھومجھے بڑے زور کا پھندا لگا۔ گلاس میرے ہاتھ سے چھوٹنے سے سارا شربت کپڑوں پرگر گیا۔ میں نے بمشکل سانس لے کر اس کی طرف دیکھا۔ بس یہ دیکھنا ہی غضب ڈھا گیا۔ جیسے ہی ہماری نظریں ملیں منظر میری آنکھوں کے سامنے سے دھندلا گیا۔ میں اس کی جھیل سی آنکھوں میں ڈوب گیا۔ وہ چلتی ہوئی میرے پاس آگئی تھی۔ نازک بدن سے اٹھتی مدہرمہک نے مجھے بے خود کردیا۔ بس اتنا یاد ہے کہ لڑکی میرے قریب آئی اور اس نے خودکومیرے اوپر گرا دیا۔ اس کے بعد کا منظر۔۔۔جیسے کوئی خواب دیکھ رہا تھا۔ جب دوبارہ میری آنکھ کھلی تو سامنے بیٹھے ہوئے شخص پر نظر پڑتے ہی میں بری طرح اچھل پڑا۔ اس بار بھی کوئی اور نہیں۔۔۔وہی مکروہ صورت سادھو تھا۔۔۔سادھو امر کمار۔

بڑے کروفر سے میرے سامنے والی چارپائی پر نیم دراز، وہ گہری نظروں سے میری طرف دیکھا رہا تھا۔ مجھے یہاں لانے والی لڑکی اسکے پہلو میں دراز تھی۔ جیسے ہی میری نظر اپنے جسم پر پڑی حیرت سے میری آنکھیں پھٹی کی پھٹی رہ گئی۔ میں مکمل بے لباس تھی۔ ستر پوشی کے لئے میری نظریں اپنے کپڑوں کو تلاش کر رہی تھیں پر وہ مجھے کہیں نظر نہ آئے۔

’’ہا۔۔۔ہا۔۔۔ہا۔۔۔‘‘ کمرے میں سادھو کاخوفناک قہہقہ گونج اٹھا۔

’’کیا ڈھونڈ رہا ہے بالک؟‘‘ اسنے میری بے بسی کا مذاق اڑیا۔ میں نے خودکوکبھی اتنا بے عزت محسوس نہ کیا تھا۔ کچھ نہ پا کر میں نے اپنے ہاتھوں سے ہی ستر پوشی کرنے کی کوششکی تویہ خوفناک حقیقت پر مجھ پر کھلی میرا جسم بے حس ہوچکا ہے۔ زبان اورپلکوں کے علاوہ کوئی عضو حرکت کرنے کے قابل نہ رہا تھا۔ شرمندگی سے میرا چہرہ سرخ ہوگیا

’’میرے سامنے کیسی لجا(شرم)؟‘‘ کچھ دیر وہ مضحکہ خیز نظروں سے میری طرف دیکھتا رہا پھر زہریلے لہجے میں بولا۔’’جب توکتا بنا، اس کو کومل نار کے شریر (جسم) کو بھنبھوڑ رہا تھا تب تجھے لاج نہ آئی اس سمے تجھے اپنے شریر کے ننگے پن کی کوئی کھبر نہ تھی؟‘‘ اس کے الفاظ میرے کانوں میں تیزاب کی صورت قطرہ قطرہ گرتے رہے۔ بوڑھی عورتغائب تھی اس کی جگہ سادھو اورلڑکی نے لے لی تھی۔

’’تونے میری داسی کا بلات کار(عصمت دری)کیا ہے ۔۔۔مہاراج امر کمار کی داسی کے شریر سنگ کھلواڑ کرکے تو نے گھور پاپ (بہت بڑا گناہ) کیا ہے جس کی سجا (سزا) تجھے اوش ملے گی ‘‘ یکدم اس کی آنکھیں سرخ ہوگئیں۔ وہ کچھ دیر مجھے گھورتا رہا پھر آہستہ آہستہ اس کے ہونٹوں پر مسکراہٹ آگئی۔

’[تجھے اپنی دھرم پتنی سنگ ادھیک پریم (بہت پیار) ہے یہی کہا تھا نا تونے اس دن۔۔۔کہاں گیا تیرا وہ پریم؟ تو تو بڑا بلوان بنتا تھا۔ یاد ہے نا تجھے۔۔۔تو نے کہا تھا؟ یدی(اگر) میں دوبارہ تیرے آڑے آیا تو مجھے شما(معاف) نہیں کرے گا‘‘ وہ براہ راست میری آنکھوں میں دیکھ رہا تھا۔ ’’اب دیکھ توکیسے میرے سامنے لاچار پڑا ہے۔ اس دن مادھو پور کے تھانے میں نہ جانے کیسے تو میرے ہاتھ سے نکل گیا تھا؟ پرنتو آج کوئی چمتکار دکھانے میں سپھل نہ ہو پائے گا‘‘

میں چپ چاپ اس کی ہر زہ سرائی سنتا رہا۔ مجھے سب سے زیادہ فکر اپنی ستر پوشی کی تھی۔

’’بولتا کیوں نہیں۔۔۔؟ آج کہاں گیا تیرا وہ تیکھا پن؟ تجھ میں تو آج اتنی شکتی بھی نہیں کہ تو اپنا شریر ہی ڈھک سکے۔چلا تھا مہاراجامرکمار کونشٹ(تباہ)کرنے ہونہہ۔۔۔مورکھ‘‘ وہ الفاظ کا زہر کافی دیر تک میرے کانوں میں انڈیلتا رہا۔

میں بے بسی کی تصویر بنا، برہنہ اس کے سامنے پڑا تھا۔ میرا دل چاہ رہا تھا کہ زمین پھٹ جائے اور میں اس میں سما جاؤں۔ آج مجھے شدت سے شریف کے والد صاحب کی نصیحت یاد آئی ’’غیر محرم عورت سے دور رہنا‘‘ نہ جانے شربت میں ایسا کیا تھا کہ میں اپنے ہوش و حواس کھو بیٹھا تھا۔ ان جانے میں جو کچھ میں اس کے ساتھ کر بیٹھا تھا اس کا پچھتاوا ہی میرے لئے کیا کم تھا کہ یہ بدبخت سادھو مجھے مزید شرمسار کیے جا رہا تھا۔یقیناًیہ کوئی آبرو باختہ لڑکی تھی جسے سادھو نے اپنے مقصد کے لیے استعمال کیا تھا۔ لیکن با با جی نے تو کہا تھا جب تک تعویز میرے گلے میں ہوگا کوئی خبیث شے میرے اوپر حاوی نہ ہو سکے گی۔ اس نے جیسے میری سوچ پڑھ لی تھی۔

’’تیرے گرو کا کڑا(حصار) جو اس نے تیرے شریر کے گرد کھینچا تھا اسی سمے ٹوٹ گیا جب تو نے اس ناری کے ہاتھوں جل پی کر اس سنگ اپنے شریر کا سمبندھ جوڑا تھا۔‘‘ کچھ دیر وہ میری آنکھوں میں دیکھتا رہا۔’’یہ نہیں پوچھے گا وہ کیا شے تھی جو اس کومل نار نے تجھے پلائی؟‘‘

تجسس تو مجھے بھی تھا کہ وہ کیا چیز تھی جسے پینے کے بعد میں مدہوش ہو کر قعر مذلت کی انتہا گہرائیوں جا اترا تھا۔ میں نے سوالیہ نظروں سے اس کی طرف دیکھا۔

’’وہ مدھ(شراب) تھا۔۔۔ہاں شکنتلا نے تجھے مدھ پلایا تھا جو تجھے اتنا بھایا کہ تو اسے پی گیا۔ ‘‘ اس کے مکروہ ہونٹوں پر ایسی مسکراہٹ ابھری جس میں فتح کا نشہ تھا۔ مجھے بڑے زور کی ابکائی آئی۔ ’’اب تیرا گرو تیرے واسطے کچھ بھی نہیں کر سکتا۔۔۔۔تو کیوں میرے اشاروں پر ناچے گا۔ تو نے ایک ہندو ناری کا بلات کار کیا ہے۔۔۔بستی والے تیری ارتھی (جنازہ) اٹھانے کے کارن بیاکل(بے چین) ہو رہے ہیں۔ یدی تو نے میری بات نہ مانی تو میں تجھے ان کے حوالے کردوں گا پھر وہ جانیں اور تو ‘‘ اس کے لہجے سے سچائی کا اندازہ لگایاجا سکتا تھا۔

’’تو مجھ سے کیا چاہتا ہے؟‘‘ میں نے مفاہمت کا انداز اپناتے ہوئے پوچھا۔ وقتی طور پر اس کی ہاں میں ہاں ملانے سے میرا مسئلہ حل ہو سکتا تھا اس لئے میں نے مفاہمتی انداز اپنایا تھا۔ اس کی مسکراہٹ گہری ہوگئی۔

’’اب کی ہے تو نے بدھی مانو(عقلمندوں) جیسے بات۔۔۔تو اپنی دھرم پتنی کو طلاق دے دے‘‘ اس کے الفاظ میرے کانوں میں پگھلے ہوئے سیسے کی طرح پڑے۔

’’بند کر اپنی بکواس حرامزادے۔۔۔! یہ تو مر کر بھی نہیں ہو سکتا۔۔۔‘‘ غصے سے میرے بدن میں آگ لگ گئی۔

’’ہوگا۔۔۔اوش ہوگا یدی۔۔۔تو اسے نہیں چھوڑے گا تو وہ تجھے چھوڑ کر چلی جائے گی۔ میں نے اپنا ایک چیلا بھیج دیا ہے تھوڑے ہی سمے میں وہ تیری پتنی کو لے کر آتا ہوگا۔۔۔‘‘ الفاظ تھے یا بم جو میرے سرپر پھٹا ۔ وہ بولتے بولتے بری طرح چونک گیا۔ یک بیک اس کی آنکھوں کی چمک بڑھ گئی اور وہ اٹھ کر بیٹھ گیا۔ اس نے ہاتھ سے شکنتلا کو پرے ہٹایا اور چارپائی سے اٹھ کھڑا ہوا۔ میں پوری جان سے لرز گیا۔

’’کہیں اس کا کارندہ صائمہ کو لے کر تو نہیں آگیا؟‘‘ اس سوچ نے مجھے دہلا دیا۔’’اگر یہ سچ کہہ رہا ہے تو۔۔۔؟ اس سے آگے میں کچھ نہ سوچ سکا۔

دل میں فوراً خیال آیا کہ اس وقت اس سے جان چھڑانے کے لیے کہہ دیتا ہوں ٹھیک ہے میں اس کی بات مان لوں گا لیکن مجھے ایک دن سوچنے کے لیے دے دے۔میں نے کچھ کہنے کے لیے لب کھولے ہی تھے کہ میرے کانوں میں سادھو کی آواز آئی۔

’’آہا۔۔۔ دیوی جی آئی ہیں، پدھارئیے دیوی جی!پدھارئیے۔۔۔میرے دھن بھاگ۔ آج تو چیونٹی کے گھر نارائین آئے ہیں۔‘‘ اس کی آنکھیں چمکنے لگیں۔جس چارپائی پر میں بے حس پڑا تھا۔ دروازہ بالکل اس کے سامنے تھا۔

سادھو بند دروازے پر نظریں جمائے کھڑا تھا۔ مجھے اپنے جسم سے جان نکلتی ہوئی محسوس ہوئی’’یہ ضرور صائمہ ہوگئی‘‘ اس بدبخت کی طاقت کے کئی کرشمے تو میں دیکھ ہی چکا تھا۔ اسکے لئے کوئی مشکل نہ تھاکہ وہ اپنے جادو کے زور سے صائمہ کو یہاں بلوا لے۔ مجھے شدت سے موت کی خواہش ہوئی

اچانک دروازہ کھلا میں نے شرم سے اپنی آنکھیں بند کر لیں۔‘‘ کاش زمین پھٹ جائے اور میں اس میں سما جاؤں۔‘‘ دل میں شدت سے یہ خواہش اُبھری۔ اس حال میں کس طرح اپنی باوفا بیوی کا سامنا کر سکتا تھا؟ جب کچھ دیر گزر گئی اور خاموشی چھائی رہی تو میں نے ڈرتے ڈرتے آنکھیں کھولیں اور حیران رہ گیا۔ دروازے کے بیچوں بیچ وہی بلی کھڑی تھی جس نے سادھو کو زمین چاٹنے پرمجبور کر دیا تھا۔ بلی کو دیکھ کر مجھے کچھ آس بندھی۔

مجھے غنیمت لگا۔ میرا جسم ابھی تک شل تھا میں نے ہاتھ ہلانا چاہا لیکن بہت زور لگانے کے بعد بھی اسے حرکت دینے کے قابل نہ ہو سکا۔ بے بسی کے احساس سے میرا دل ابھر آیا۔ میں نے آنسوبھری آنکھوں سے بلی کی طرف دیکھا۔ اس کے جسم کے سارے بال کھڑے تھے۔ وہ یک ٹک سادھو کی آنکھوں میں دیکھ رہی تھی۔ سادھو بھی سب سے بے نیاز بلکی طرف متوجہ تھا۔ مجھے یہاں لانے والی لڑکی اب اٹھ کر بیٹھ گئی۔ وہ بھی حیرت بھری نظروں سے بلی کو دیکھ رہی تھی۔ اچانک بلی کی آنکھوں سے سرخ روشنی کی شعاع نکلی اور سیدھی سادھوکے چہرے پر پڑی۔ بنگلے کے لان میں اس نے مجھ پر بھی روشنی کی شعاع ڈالی تھی پر وہ دودھیا روشنی تھی۔ سادھو کے ہونٹوں پر معنی خیز مسکراہٹ ابھری۔

’’دیوی! کیوں اپنا اور میرا سمے برباد کرے ہے اب تیرا کوئی وار مجھ پر چلنے والانہیں۔ اس دن تو میں بے کھبری میں مار کھا بیٹھا تھا۔آج تو کسی چمتکار میں سپھل نہ ہو پائے گی۔‘‘ یکدم بلی کی آنکھوں سے روشنی نکلنا بند ہوگئی۔ اسنے چہرہ گھما کر سادھو کے پہلو میں دراز لڑکی کی طرف دیکھا۔ اس بار اس کی آنکھوں سے نکلنے والی سرخ شعاع شکنتلا پر پڑی۔ شعاع کا اس کے جسم پر پڑنا تھا کہ ایک شعلہ سا لپکا اور شکنتلا کے جسم نے آگ پکڑلی۔اس کی کربناک چیخ کمرے میں گونج اٹھی۔ وہ تڑپ کر چارپائی سے نیچے گر گئی۔ آنا فانا آگ نے اسے پوری طرح گھیر لیا تھا اور وہ بری طرح تڑپ رہی تھی اس کی چیخیں دل دہلا رہی تھیں۔ کمرے میں گوشت کے جلنے کی چراند پھیل گئی۔ میں حیرت سے آنکھیں پھاڑے دیکھ رہا تھا۔ سادھو کی غضب ناک دھاڑ سے کمرہ گونج اٹھا۔

’’دیوی! مجھے مجبور نہ کر کہ میں تجھے شراپ دوں۔ میں نے کالی ماتا کو وچن دیا ہے تجھے اس کے چرنوں میں پہنچاؤں گا۔ مجھے اپنا وچن توڑنے پر مجبور نہ کر۔‘‘ اس کی آنکھوں میں شعلوں کا رقص جاری ہوگیا ۔ا س نے ایک نظر جلتی ہوئی لڑکی پر ڈالی جہاں ایک جلا ہوا ڈھانچہ ساکت پڑا تھا۔ اس کی روح پرواز کر چکی تھی۔ سادھو اسے ایک نظر دیکھ کر بلی سے مخاطب ہوا۔

’’تو نے اپنے پریمی کے کارکن میری داسی کوپرلوک بھیج دیا۔ اب میں تیرے اس پریمی کو نرکھ میں بھیجوں گا۔ یوں بھی تجھے شوبھا(زیب) نہیں دیتا کہ تو ایک ملیچھ مسلے سنگ سمبندھ جوڑے‘‘ وہ جز بز ہوتے ہوئے بولا۔ بلی نے چہرہ گھما کر میری طرف دیکھا۔ یکایک اس کے چہرے پر شرمندگی کے تاثرات ابھر آئے۔ میں آپ کوپہلے بھی بتا چکا ہوں کہ میں نے اپنی زندگی میں نے یہ واحد بلی دیکھی تھی جو باقاعدہ انسانوں کی طرح اپنے جذبات کا اظہار کرنے پر قادرتھی۔ ا سکی آنکھوں سے دودھیا روشنی کی ایک شعاع نکل کر میرے جسم پر پڑی اس کے ساتھ ہی میری کھوئی ہوئی طاقت بحال ہوگئی۔ میں نے ہاتھ کو حرکت دینے کی کوشش کی اور یہ دیکھ کر میری خوشی کی انتہا نہ رہی کہ میں ہاتھ ہلا سکتا تھا۔

بجلی کی سی تیزی سے میں اپنے لباس پر جھپٹا اور سب سے پہلے اپنی ستر پوشی کی۔ بلی پھر سادھو کی طرف متوجہ ہوگئی تھی۔ دونوں ایک دوسرے کی آنکھوں میں آنکھیں ڈالے دیکھ رہے تھے۔ سادھو جیسے کشمکش میں تھا اسے فیصلہ کرنے میں شاید کسی دشواری کا سامنا تھا۔ کچھ دیر بعد وہ گھمبیر لہجے میں بولا۔

’دیوی۔۔۔! میں نے اپنی داسی کی مرتیو بھول سکتا ہوں۔ داسیوں کا جیون ہوتاہی کیول اسی کارن ہے کہ وہ مہاپُرشو پر بلیدان ہو جائیں بھگوان انہیں جیون دان ہی اسی کارن کرتا ہے۔ یدی اب بھی تو کالی ماتا کی آگیا کا پالن کرتے ہوئے میرے چرنوں میں آجا تو میں سب کچھ بھول جاؤں گا۔‘‘ بلی آہستہ سے غرائی جیسے اس نے سادھو کی بات کا جواب دیا ہو۔ سادھو کا چہرہ پھر غضبناک ہوگیا۔ اس کے بھدے ہونٹ متحرک ہوگئے۔ بلی کے منہ سے عجیب سی آواز نکلی یکدم دروازہ پوری طرح کھل گیا اور کالی سیاہ بلیوں کا ایک غول اندر آگیا۔ کمرے میں ہر طرف بلیاں ہی بلیاں نظر آنے لگیں۔ سب ساھو امر کمار کو گھور رہی تھیں۔

’’دیوی۔۔۔! مجھے مجبور نہ کر۔۔۔کیا میں تجھے بتاؤ تو اس سمے کس کے سامنے کھڑی ہے؟‘‘ سادھو کے ہونٹوں سے غراہٹ نکلی۔ وہ چوکنا سا دکھائی دے رہا تھا۔ اس نے چھت کی طرف منہ کرکے کچھ پڑھا اور اپنے جسم پر پھونک لیا۔ اس کے بعد وہ آنکھیں بند کرکے کھڑا ہوگیا۔ کمرے میں سکوت چھایا ہوا تھا۔ اچانک سادھو نے آنکھیں کھول کر بلی کی طرف دیکھا پھر کسی نادیدہ ہستی کو مخاطب کیا۔

’’گرو جی! میں نے تیری آگیا کا پالن کرتے ہوئے اس پاپن کو کھبر دار کر دیا پرنتو یہ اس ملیچھ مسلے سنگ اپنا من لگائے بیٹھی ہے۔ یدی تیری آگیا ہو تو میں اس پاپن کو تھوڑی سی شکشا (سبق) دے دوں؟‘‘ وہ کسی نادیدہ استاد سے مخاطب تھا۔

کچھ دیر کی خاموشی کے بعد چھت کی طرف منہ کرکے بولا۔ ’’دھن باد گرو جی! تو نے اپنے چیلے کا مان رکھ لیا۔ دھن ہو گرو جی ! دھن ہو۔‘‘ اس نے ایک بار پھر بلی کی طرف دیکھا اور اس کی آنکھیں لال انگارہ ہوگئیں۔ کچھ دیر وہ بلی کی طرف دیکھتا رہا پھر میری جانب مڑا۔۔۔اور اپنے ہاتھ کا رخ میری طرف کر دیا جس میں سے آگ کا ایک شعلہ نمودار ہو کرمیری طرف بڑھا۔ میں بری طرح بدحواس ہوگیا۔ اچانک ایک بلی نے چھلانگ لگائی اور شعلے کی زد میں آکر ایک پل میں راکھ بن کر زمین پر گر گئی۔ اگر وہ شعلہ میرے بدن سے ٹکراتا تو میرا بھی یہی حال ہوتا۔ اس سوچ نے مجھے لرزا دیا۔

بلی کو جلتے دیکھ کر سادھو کی آنکھوں میں قہر اُتر آیا۔ اس نے ایک بار پھر اپنا دایاں ہاتھ میری طرف کر دیا۔ اچانک اس کے ناخن لمبے ہونے لگے۔ ان کی شکل برف توڑنے والے سوئے جیسے ہوگئی تھی۔ ناخن تیزی سے میری طرف بڑھ رہے تھے موت کو سر پر منڈلاتے دیکھ کر میں بری طرح بداحوس ہوگیا۔ سادھو مجھے سزا دینے کے چکر میں بلی کو فراموش کر بیٹھا اور یہی غلطی اس کے لیے جان لیو ثابت ہوئی۔ اچانک سفید بلی زور سے غرائی اور اس نے سادھو پر چھلانگ لگا دی۔ سادھو نے جلدی سے اپنے ہاتھ کا رخ اس کی طرف کر دیا لیکن اسے دیر ہو چکی تھی۔ بلی اس کے نرخرے پر جھپٹی اگلے ہی لمحے اس نے سادھو کا نرخرہ ادھیڑ دیا۔ وہ کسی ذبح ہوتے بکرے کی طرح ڈکرایا اور زمین پر گر گیا۔ بلی اس کے نرخرے سے چمٹ گئی تھی۔سادھو بری طرح ہوا میں ہاتھ چلا رہا تھا لیکن بلی نے تھوڑی ہی دیر میں اس کا نرخرہ ادھیڑ کر رکھ دیا۔ وہ دھڑام سے زمین پر آرہا۔ چانک ساری بلیوں نے اس پر حملہ کر دیا۔ وہ سب سادھو کو نوچ رہی تھیں۔ بلیاں اس کے جسم سے اس طرح چمٹی ہوئی تھیں جیسے چیونٹیاں گوشت کی بوٹی سے چمٹ جاتی ہیں۔

دو منٹ میں انہوں نے سادھو کے جسم کا سارا گوشت چٹ کر لیا اور اب خون آلود ہونٹوں کو سرخ زبان نکال کر چاٹ رہی تھیں۔ سادھو کا بے گوشت ڈھانچہ زمین پر پڑا تھا۔

مجھ سے یہ خوفناک منظر دیکھا نہ گیا اور میں نے آنکھیں بند کر لیں۔ گلاب کی خوشبو کا تیز جھونکا میری ناک سے ٹکرایا اور میں ہوش و حواس کی دنیا سے دور چلا گیا۔ نہ جانے کتنا عرصہ بے ہوش رہا۔ پھر میرے کانوں میں مختلف قسم کی مدہم مدہم آوازیں آنے لگیں۔ کوئی رو رہا تھا۔ کوئی باتیں کر رہا تھا۔ میں آہستہ آہستہ لاشعور سے شعور کی طرف محو سفر رہا ۔ آوازیں اب واضح ہونے لگیں تھیں۔ میری آنکھوں کے سامنے دودھیا رنگ کی روشنی پھیلنے لگی ۔اندھیرا چھٹنا شروع ہوگیا۔ آنکھیں کھولنے کی کوشش کی پلکیں جیسے ایک دوسرے سے جڑ گئی تھیں۔ بمشکل آنکھیں کھولنے پر قادر ہوا۔ مجھے کسی کا دھندلا سا چہرہ نظر آیا۔ کوئی لڑکی تھی جس نے سفید لباس پہنا ہوا تھا۔ مزید کوشش کرنے پر میری آنکھیں پوری طرح کھل گئیں۔ میرے اوپر کوئی جھکا ہوا تھا۔ نسوانی آواز میرے کانوں سے ٹکرائی۔

’’ڈاکٹر صاحب! مریض کو ہوش آرہا ہے۔‘‘ پھر تیز تیز قدموں کی آواز سنائی دی۔ اب میری آنکھوں کے سامنے کسی مرد کا چہرہ ابھر آیا۔

میرا شعور مکمل طور پرجاگ گیا تھا

’’کیسی طبیعت ہے جوان! ‘‘ میرے کانوں میں ایک مہربان سی آواز آئی۔

’’ٹھیک ہوں‘‘ میرے منہ سے بمشکل آواز نکلی۔ آہستہ سے میں نے چہرہ گھما کر دیکھا ایک جانا پہچانا سا چہرہ دکھائی دیا۔ میں نے یادداشت پر زور دیا اور پہچان گیا ۔وہ میرا دوست عمران تھا۔ سسکیوں کی آواز اب بھی آرہی تھی۔ میں نے آواز کی سمت چہرہ گھمایا۔ سفید چادر میں لپٹی وہ کوئی اور نہیں صائمہ تھی۔ میں نے جلدی سے اٹھنے کی کوشش کی بڑے زور کا شکر آیا اور میں کراہ کر دوبارہ بیڈ پر گر گیا۔

’’آرام سے لیٹے رہو۔ ابھی اٹھنے کی ضرورت نہیں‘‘ میرے کانوں میں وہی شفیق آواز پڑی۔

’’صائمہ‘‘ میرے منہ سے کمزور سی آواز نکلی۔ وہ لپک کر میرے پاس آگئی۔ اس کا چہرہ آنسوؤں سے تر تھا۔

’’خدا تعالیٰ کا لاکھ لاکھ شکر ہے فاروق! آپ کو ہوش آگیا‘‘ اس نے روتے ہوئے میرا ہاتھ تھام لیا۔

’’مجھے کیا ہوا ہے؟‘‘ نقاہت کے مارے بولنا دشوار محسوس ہو رہا تھا۔

’’تم بالکل ٹھیک ہو جوان! بس معمولی سا بخار ہوگیا تھا‘‘ ڈاکٹر نے دوبارہ مجھے تسلی دی۔ میں نے سفید اوورآل اور گلے میں لٹکے سٹیتھسکوپ سے اسے پہچانا۔

اچانک میری یاداشت نے کام کرنا شروع کر دیا۔ واقعات ایک تسلسل کے ساتھ میری آنکھوں کے سامنے سے گزرنے لگے۔ اس وقت کا تصور کرکے میں کانپ گیا۔

’’سادھو کا ڈھانچا یہاں سے ہٹا دو پلیز‘‘ بے اختیار میرے منہ سے نکلا۔

’’فاروق ! ڈاکٹر صاحب نے آپ کو بولنے سے منع کیا ہے۔ پلیز خاموشی سے لیٹے رہیں۔‘‘ صائمہ نے پیار سے میرے ماتھے پر آئے پسینے کو اپنی چادر کے پلو سے صاف کیا۔

’’لیکن صائمہ! میں کہاں ہوں مجھے یہاں کون لایا؟ میں تویہاں سے بہت دور ایک بستی میں تھا‘‘ میں نے ادھر ادھر دیکھا۔’’یہ تو ہسپتال کا کمرہ لگتا ہے۔‘‘

’’آپ کو بہت تیز بخار تھا اس لئے میں آپ کو یہاں لے آئی تھی اب آپ کی طبیعت بالکل ٹھیک کل انشاء اللہ ہم گھر چلے جائیں گے۔‘‘ اس نے مجھے تسلی دی۔

’’خان بھائی! فکر کی کوئی بات نہیں آپ کو معمولی بخار ہوگیا تھا‘‘ عمران نے میرے پاس آکر کہا۔

’’گاؤں سے مجھے یہاں تم لائے تھے؟‘‘ میں نے اس سے پوچھا۔ یہ بات میری سمجھ سے بالاتر تھی کہ اچانک بستی سے میں یہاں کیسے پہنچ گیا؟‘‘

’’ہاں خان بھائی! میں ہی آپ کو یہاں لایا تھا لیکن بستی سے نہیں بینک کے باہر آپ گاڑی میں بے ہوش پڑے تھے‘‘ اس نے آہستہ سے کہا۔ اچانک مجھے اپنے بازو میں چبھن کا احساس ہوا ۔نرس مجھے انجکشن لگا رہی تھی۔ ایک بار پھر میری پلکیں بوجھل ہونے لگیں تھوڑی دیر بعد میں غافل ہوگیا۔ جب دوبارہ میری آنکھ کھلی تو دن کے اجالے نے کمرے کو روشن کر رکھا تھا۔ میں نے گردن گھما کر دیکھا صائمہ کرسی پر بیٹھی تسبیح پڑھ رہی تھی جیسے ہی اسکی نظر مجھ پر پڑی وہ تیر کی طرح میرے پاس آئی۔ اس کے ہونٹ ہل رہے تھے۔ اس نے پہلے تو کچھ پڑھ کر میرے اوپر پھونکا پھر پوچھا۔’’فاروق ! اب آپ کی طبیعت کیسی ہے؟‘‘

’’ٹھیک ہوں لیکن تم مجھے یہ بتاؤ مجھے کیا ہوا تھا؟‘‘ میں نے اسکاہاتھ پکڑ کر پوچھا۔

’’آپ کو بخار ہو گیا تھا۔‘‘ اس نے پیار سے میرے ہاتھ کو سہلایا۔

’’لیکن تم مجھے ہاسپٹل میں کیوں لے آئیں۔ بخار تو ہو ہی جاتاہے کہیں تم مجھ سے جھوٹ تونہیں بول رہیں؟‘‘

’’نہیں فاروق! میں نے پہلے کبھی آپ سے جھوٹ بولا ہے؟‘‘ وہ روہانسی ہوگئی’’آپ اس وقت ملتان کے نشتر ہاسپٹل میں ہیں‘‘ صائمہ نے آہستہ سے کہا۔

’’صائمہ یہاں میرے پاس بیٹھو‘‘ میں نے اسکا ہاتھ پکڑ کر پاس بٹھا لیا۔

’’سچ سچ بتاؤ مجھے کیا ہوا تھا؟ کون مجھے یہاں لایا تھا اور کہاں سے؟‘‘ مجھے اندیشہ تھا کہیں یہ لوگ مجھے اس گاؤں سے تو نہیں لائے جہاں پر میں نے اس لڑکی کے ساتھ۔۔۔اس کے آگے مجھ سے کچھ سوچا نہ گیا حالانکہ عمران نے بتایا تھا کہ وہ مجھے بینک کے باہر سے بے ہوشی کی حالت میں لایا تھا۔ لیکن مجھے شبہ تھا شاید وہ اصل بات چھپا گیا ہے۔

’’آپ کو آج پورے چار دن بعد ہوش آیا ہے ڈاکٹرز تو آپ کی طرف سے بالکل مایوس ہو چکے تھے۔ ہاسپٹل کے انچارج پروفیسر ڈاکٹر جمیل قریشی صاحب، انگل بیگ کے دوست ہیں۔ انہوں نے بڑی توجہ سے آپ کا علاج کیا‘‘ اطمینان بھرا سانس میرے سینے سے خارج ہوگیا۔

’’فاروق ! اچانک آپ کو کیا ہوگیا تھا۔ عمران بھائی بت رہے تھے وہ کسی کام سے بینک سے باہرنکلے تو آپ گاڑی میں سیٹ پر لیٹے ہوئے تھے۔ اس نے آپ کو پکارا جواب نہ ملنے پر اس نے دروازہ کھول کر آپ کے کندھے پر ہاتھ رکھا تو پتا چلا آپ بخارمیں پھنک رہے ہیں۔ وہ آپ کو سیدھا ہسپتال لے گئے اور نازش کو فون پر ساری صورتحال بتائی۔ جب مجھے پتا چلا تو ہم دونوں ہسپتال آگئیں۔ آپ کا بخار دم بدم بڑھتا جا رہا تھا شام تک ڈاکٹرز بھی گھبرا گئے انہوں نے آپ کو نشتر ہسپتال لے جانے کا مشورہ دیا چنانچہ آپ کو یہاں لایا گیا آج پانچویں دن آپ کا بخاراترا ہے۔‘‘ صائمہ نے مجھے تفصیل بتائی۔

’’بچے کہاں ہیں؟‘‘میں نے پوچھا۔

’’میں نے کل انہیں پروفیسر انکل کے ساتھ بھیج دیا تھا مومنہ بہت تنگ کر رہی تھی۔ ‘‘صائمہ نے بتایا۔میں نے ایک بار پھر آنکھیں موند لیں۔

’’پریشانی میں مجھے پوچھنا یاد ہی نہ رہا لیکن آپ کہاں چلے گئے تھے؟‘‘ صائمہ نے پوچھا۔

’’مم ۔۔۔میں کہیں ضروری کام سے گیا ہوا تھا وہاں میری طبیعت خراب ہوگئی۔ بمشکل بینک تک گاڑی ڈرائیو کرتا آیا اس کے بعد مجھے ہوش نہ رہا۔‘‘ میں نے فوراً کہانی گھڑ دی۔

یہ سن کر مجھے بڑا اطمینان ہوا تھا کہ صائمہ کو کسی بات کا پتا نہیں چلا۔ شام تک میری طبعیت مزید سنبھل گئی تو ڈاکٹر نے جانے کی اجازت دے دی اور ہم واپس اپنے شہر آگئے۔

صائمہ نے انکل بیگ اور عمران وغیرہ کو فون کر دیا تھا اسلیے جب ہم پہنچے تو سب بنگلے پر موجود تھے۔ بچے میرے ساتھ لپٹ گئے۔ڈرائیونگ صائمہ کی تھی کیونکہ مجھ میں اتنی سکتنہ تھی۔ رات کو صائمہ تو تھکن کی وجہ سے جلد سوگئی جبکہ نیند میری آنکھوں سے کوسوں دور تھی۔ گزرے واقعات بار بار میری آنکھوں کے سامنے گردش کر رہے تھے۔ میں خیالات کو اپنے ذہن سے جھٹکتا تھا لیکن تھوڑی دیر بعد پھر کوئی نہ کوئی خیال میرے ذہن کو جکڑ لیتا ۔ کیا واقعی وہ ایک بلی تھی؟ اس برے وقت میں وہ میرے لئے رحمت کا فرشتہ ثابت ہوئی تھی۔ کیا ایک معمولی سے جانور کے لئے ممکن ہے کہ وہ اتنے طاقتور سادھو کو منٹوں میں ادھیڑ کر رکھ دے؟ سادھو کی جادوئی طاقت میں اپنی آنکھوں سے دیکھ چکا تھا۔ اس بدبخت نے مجھے اتنا بے بس کر دیا تھا کہ میں اپنے جسم کوہلانے سے معذور ہوگیا تھا۔

واقعی وہ ایک بلی ہے یا۔۔۔؟ میں جتنا سوچتا اتناہی الجھتا گیا آخر کار تنگ آکر میں خواب آوار دوا کی ایک خوراک لی جس سے مجھے نیند آگئی۔ رات کا جانے کونسا پہر تھا کہ میری آنکھ کھل گئی۔ کمرے میں گھپ اندھیرا چھایا ہوا تھا۔ حالانکہ مجھے اچھی طرح یاد ہے جب ہم سونے لگے تھے تو صائمہ نے لائٹ بجھا کر زیرو پاور کا نیلا بلب جلا دیا تھا۔ صائمہ دوسری طرف کروٹ بدلے سو رہی تھی اسکی ہموار سانسوں کی آواز کمرے کی خاموشی میں آرہی تھی۔ سردی بڑھ گئی تھی میں نے اپنے پیروں کے گرد کمبل کواچھی طرح لپیٹ لیا۔ ابھی میں آنکھیں بند کرنے ہی لگا تھا مجھے اندھیرے میں دو نقطے چمکتے نظر آئے۔ ان سے دودھیا روشنی نکل کر میرے چہرے پر پڑنے لگی۔ میں چونک گیا۔ میرے کانوں میں ’’میاؤں‘‘ کی ہلکی سی آواز آئی۔

بے اختیار میں نے سائیڈ لیمپ جلا دیا۔ کمرے میں ہر طرف روشنی پھیل گئی۔میری نظر سامنے پڑی تو میں دنگ رہ گیا۔ وہی بلی جس نے مجھے سادھو کے چنگل سے بچایا تھا بیٹھی تھی۔ وہ یک ٹک میری طرف دیکھ رہی تھی۔ میں بیڈ سے اتر کر اس کی طرف بڑھا۔ بہرحال وہ میری محسنہ تھی۔ اگر اس نازک وقت میں وہ میری مدد نہ کرتی تو ۔۔۔؟ بے اختیار مجھے جھرجھری آگئی۔

جیسے ہی میں بلی کی طرف بڑھا۔ وہ بدک کر مجھ سے کچھ فاصلے پر پہنچ گئی۔ میں دوبارہ اس کی طرف بڑھا تو اس نے پھر وہی حرکت کی۔ وہ برابر میری طرف دیکھ رہی تھی اسکے چہرے کے تاثرات سے ظاہر ہو رہا تھا جیسے وہ میرے پاس آنا چاہتی ہے لیکن کسی وجہ سے مجبور ہے۔

’’کیا بات مجھ سے ناراض ہو؟‘‘ نہ جانے کیسے میرے منہ سے یہ الفاظ نکل گئے۔ پھر خود ہی مجھے اپنی بات ہر ہنسی آگئی۔ میں تو اس کے ساتھ ایسے بات کر رہا تھا جیسے وہ میری بات سمجھ رہی ہو۔ لیکن سادھو بھی تو اس کے ساتھ ہم کلام رہا تھا۔ میں نے اس کی طرف دیکھ کر دوبارہ کہا

’’ادھر آؤ میرے پاس‘‘ اس کے چہرے پر بے بسی کے تاثرات مزید واضح ہوگئے۔ اس نے ہلکے سے میاؤں کیا اور کمرے کے کونے تک چلی گئی۔ میں ایک بار پھر اس کی طرف بڑھا۔ وہ بے چین ہونے لگی۔ میں اس سے کچھ فاصلے پر کھڑا ہوگیا۔ اس نے منہ اٹھا کر میری طرف دیکھا۔ یہ دیکھ کر میری حیرت کی انتہا نہ رہی اس کی آنکھوں سے آنسو بہہ رہے تھے۔ کچھ دیر تک وہ میری طرف دیکھتی رہی پھر مضمحل ہو کر اٹھی اور کھڑکی کی چوکھٹ پر چڑھ گئی۔ ایک بار پھر اس نے میری طرف مڑ کر دیکھا پھر باقاعدہ پنجے سے پردہ ہٹا کر اس کے پیچھے چلی گئی۔ میں جلدی سے آگے بڑھا اور پردہ ہٹا کر دیکھا لیکن وہاں تو ایک چیونٹی بھی نہ تھی۔

میں نے چاروں طرف نظر دوڑائیں لیکن بلی کہیں بھی نہ تھی

میں نے چاروں طرف نظر دوڑائیں لیکن بلی کہیں بھی نہ تھی۔

’’شاید کھڑکی کھلی رہ گئی ہے‘‘ یہ سوچ کر میں نے کھڑکی کھولنا چاہی پر وہ بند تھی چٹخنی لگی ہوئی تھی۔ میں نے ہلکی آواز سے ایک دوبارہ’’مانو‘‘ کرکے پکارا کہ شاید ہو بیڈ یا ٹیبل کے یچے ہو اور باہر آجائے لیکن بے سود۔ میں دوبارہ بیڈ پر لیٹ گیا تھوری دیر بعد مجھے نیند آگئی۔ رات کو میں نے خواب میں دیکھا۔ گھر کے لان میں بیٹھا ہوں شام کا وقت ہے کہ اچانک گیٹ سے ایک نہایت حسین عورت داخل ہو کر مجھ سے کچھ فاصلے پر کھڑی ہو جاتی ہے۔ میں حیرت سے اسے دیکھتا ہوں وہ اس قدر حسین ہوتی ہے کہ میں گنگ اسے دیکھتا رہتا ہوں میرے منہ سے ایک لفظ نہیں نکلتا۔ وہ چلتی ہوئی مجھ سے چند قدم کے فاصلے پر پہنچ جاتی ہے اس کے ہاتھ میں ایک سفید رنگ کا کاغز ہے جسے وہ میری طرف بڑھاتی ہے اس پر کچھ لکھا ہوتا ہے۔ میں تحریر پر نظر دوڑاتا ہوں

’’میں تمہارے بنا نہیں رہ سکتی میرے سجنا!‘‘

بس یہی چند الفاظ اس پر لکھے ہوتے ہیں۔ تحریر پڑھ کر میں نظر اوپر اٹھاتا ہوں تو وہاں کوئی بھی نہیں ہوتا۔ اچانک تیز ہوا کا جھونکا آتا ہے اور کاغذ کو میرے ہاتھوں سے اڑا کر لے جاتا ہے میری آنکھ کھل گئی۔ سامنے کارپٹ پر صائمہ نماز پڑھ رہی تھی۔ میں نے گھڑی کی طرف دیکھا رات کے تین بجے تھے صائمہ تہجد پڑھ رہی تھی۔ میں کروٹ بدل کر دوبارہ سو گیا۔

دوسرے دن میری طبیعت پوری طرح سنبھل گئی۔ میں نے بینک جانا شروع کر دیا۔ زندگی ایک بار پھر معمول پر آگئی۔ کچھ دن مزید گزر گئے کوئی خلاف توقع بات نہ ہوئی تو میں بھی سب کچھ بھلا کر مطمئن ہو گیا۔ ایک ہفتہ واقعی سکون سے گزر گیا کوئی ایسی بات نہ ہوئی جو پریشانی کا باعث بنتی۔ شاید سادھو کی موت کے بعد سارے مسئلے ہی حل ہو گئے تھے۔ اس دوران آتے جاتے ملنگ بھی کہیں نظر نہ آیا۔

ایک دن میں شریف کے والد صاحب کی خدمت میں حاضری دینے گیا انہیں سارے حالات بتائے۔ ان سے مجھے کوئی تسلی بخش جواب نہ مل سکا میں نے بھی زیادہ پرواہ نہ کی اور گھر آگیا۔ کھانا کھانے کے بعد صائمہ اور بچے تو سو گئے جبکہ میں بینک سے لائی فائلز دیکھنے لگا۔ بیماری کی وجہ سے کافی سارا کام پینڈنگ تھا جس کی وجہ سے میں اکچر فائلز گھر لے آتا اور دیر تک کام کیا کرتا۔ جب تھکن محسوس ہوئی تو میں نے ایک زور دار انگڑائی لی اور سونے کے لئے دوسرے کمرے میں چلا گیا۔ رات کو مجھے واہی خواب دوبارہ دکھائی دیا۔ فرق صرف یہ تھا کہ اس بار وہ عورت مجھ سے کم فاصلے پر کھڑی ہوئی تھی۔ صبح اٹھ کر مجھے یاد آیا تو میں نے سر جھٹک دیا۔ میں خوابوں پر یقین کرنے والا نہ تھا۔ وقت کا دریا اپنے مخصوص انداز میں بہتا ہرا۔ ہم چھٹی والے دن کبھی پروفیسر بیگ کے کبھی عمران کے گھر چلے جاتے۔ کبھی ہمارے گھر پر محفل جمتی انکل بہت بذلہ سنج واقع ہوئے تھے۔ اس پر عمران۔۔۔بات کم کرتا لطیفے زیادہ سناتا تھا۔ اس دوران محرم الحرام کی چھٹیاں ہوئی توہم تین دن لاہور گزار کر آئے۔ خوب گھومے پھرے انجوائے کیا۔ واپس آئے کچھ دن ہی ہوئے تھے کہ میری ساس اور چھوٹی سالی ناعمہ آگئیں۔ صائمہ اور ناعمہ کی شادی ایک ہی دن ہوئی تھی۔ اس کا شوہر اسسٹنٹ کمشنر اور ان دنوں وہ رحیم یار خان میں تعینات تھا ۔ صائمہ کے برعکس ناعمہ بہت شوخ تھی۔ اس کی آنکھوں میں ہر وقت شرارت ناچتی رہتی۔ ابھی تک ان کے ہاں کوئی اولاد نہ ہوئی تھی۔ میرے بچوں کے ساتھ اس کا بہت پیار تھا۔ بچے بھی اس کے دیوانے تھے۔ ایک دن ہم سب رات کے کھانے کے بعد بیٹھے چائے سے لطف اندوز ہو رہے تھے کہ ناعمہ کہنے لگی۔

’’بھائی جان! آپ کے گھر میں جنات تو نہیں؟‘‘

’’جہاں تم موجود ہو وہاں جنات کی مجال ہے کہ وہ آسکیں؟ یوں بھی جنات چڑیلوں سے ڈرتے ہیں‘‘ میری بات پر سب ہنس پڑے۔ جس پر اس نے گھور کر سب کو دیکھا اور کہنے لگی۔

’’آج صبح میں اوپر والے بیڈ روم میں بیٹھی ناول پڑ رہی تھی کہ دروازہ کھلنے کی آواز آئی۔ میں نے سوچا باجی آئی ہوں گی مڑ کر دیکھا تو دروازہ کھلا ہوا تھا لیکن کوئی موجود نہ تھا۔ میں نے سوچا ہو سکتا ہے ہوا سے کھل گیا ہو

میں پھر ناول کی طرف متوجہ ہوگئی۔ اچانک زور دار آواز سے دروازہ بند ہوگیا۔ اس کے بعد ایسے آواز آئی جیسے کوئی دروازے کے سامنے ٹہل رہا ہو۔ مجھے ڈر لگا میں جلدی سے نیچے آگئی۔‘‘

میری ساس صائمہ کو کوئی بات سنانے لگیں تو موضوع بدل گیا۔ یوں بھی وہ ناعمہ کی بات پر یقین کرنے کو تیار نہ تھیں وہ سارے گھر میں جھوٹی مشہور تھی بات آئی گئی ہوگئی۔ یہ لوگ دو دن مزید رہ کر واپس چلے گئے۔ ایک دن میں حسب معمول میں بینک میں اپنے کام میں مصروف تھا کہ صائمہ کا فون آیا۔

’’فاروق ! میرا ڈائمنڈ کا سیٹ آپ نے کہیں رکھ دیا ہے؟‘‘

’’نہیں۔۔۔میں نے تو دیکھا ہی نہیں۔‘‘ میں نے کہا۔

’’میں صبح سے ڈھونڈ رہی ہوں۔۔۔الماری میں نہیں ہے۔‘‘ صائمہ کی پریشانی سے بھرپور آواز آئی۔

’’اچھی طرح دیکھ لو کہیں رکھ کر بھول گئی ہوگی۔‘‘

’’میں نے ہر جگہ اچھی طرح دیکھ لیا ہے‘‘ وہ روہانسی ہو رہی تھی۔

’’ایک بار پھر دیکھ لو یہیں کہیں ہوگا۔‘‘ میں نے اسے تسلی دی۔

’’اچھا ایک بار پھر دیکھ لیتی ہوں۔‘‘ کہہ کر اس نے فون بند کردیا۔

شام کو میں گھر آیا تو صائمہ پریشان بیٹھی تھی’’نہیں ملا‘‘ اس نے میری طرف دیکھا۔

’’کیا نہیں ملا؟‘‘ میں نے حیرت سے پوچھا۔

’’آپ بھی کمال کرتے ہیں۔ میں نے دن کو بتایا نہیں تھا کہ میرا ڈائمنڈ کا سیٹ نہیں مل رہا۔‘‘ یہ سیٹ میں نے اسے منہ دکھائی کے طور پر دیا تھا اور اسے جان سے زیادہ عزیز تھا ’’لیکن وہ کہاں جا سکتا ہے؟‘‘ میں سیٹ کے لئے فکر مند نہ تھا لیکن صائمہ کی پریشانی مجھے کسی طور گوارا نہ تھی۔

’’فاروق! کہیں۔۔۔‘‘ صائمہ کچھ کہتے کہتے رک گئی۔‘‘ میں نے سوالیہ نظروں سے اسے دیکھا۔ وہ کچھ کہتے ہوئے جھجک رہی تھی۔

’’کیا کہہ رہی تھیں تم؟‘‘ میں نے اس کی طرف دیکھا۔

’’ایسا ہو تو نہیں سکتا لل۔۔۔لیکن‘‘ پھر وہ خاموش ہوگئی۔

’’کیا بات ہے صائمہ! تم کیا کہنا چاہ رہی ہو؟‘‘

’’کہیں ناعمہ نے تو نہیں لیا‘‘ آخر کار وہ دل کی بات زبان پر لے آئی۔

’’بری بات ہے صائمہ! یوں کسی پر الزام نہیں لگاتے جب تک اپنی آنکھوں سے نہ دیکھ لیا جائے‘‘ میں نے اسے سرزنش کی وہ رونے لگی۔

’’بچے کہاں ہیں؟‘‘ میں نے اس کا خیال ہٹانے کی خاطر سوال کیا۔

’’کارٹون دیکھ رہے ہیں۔‘‘ اس نے شوں شوں کرتے بتایا تبھی میں سوچ رہا تھا کہ وہ گاڑی کی آواز سن کر بھی باہر نہ نکلے تھے۔ میں نے صائمہ کو اپنے ساتھ لگا لیا۔

’’کیوں رو رہی ہو۔ مل جائے گا کہیں رکھ کر بھول گئی ہوگی ہو بھی تم بھلکڑ۔ کافی دیر سے شوہر صاحب آئے آئے ہوئے ہیں